ബങ്കർ ബസ്റ്റർ പോർമുനയുള്ള പുതിയ ബാലിസ്റ്റിക് മിസൈൽ വികസിപ്പിക്കാൻ ഇന്ത്യ; അടിസ്ഥാനമാകുന്നത് അഗ്നി-5

ന്യൂഡൽഹി: ബങ്കർ ബസ്റ്റർ പോർമുന വഹിക്കാൻ ശേഷിയുള്ള പുതിയ ബാലിസ്റ്റിക് മിസൈൽ വികസിപ്പിക്കാൻ ഇന്ത്യ. അ​ഗ്നി-5ൻ്റെ ഭൂഖണ്ഡാന്തര ബാലിസ്റ്റിക് മിസൈലിന്റെ പരിഷ്കരിച്ച പതിപ്പാണ് ബങ്കർ‌ ബസ്റ്റർ ബോംബിൻ്റെ പോർമുന വഹിക്കാനുള്ള ശേഷിയിലേയ്ക്ക് വികസിപ്പിച്ച് കൊണ്ടിരിക്കുന്നതെന്നാണ് റിപ്പോർട്ട്. ഡിഫൻസ് റിസേർച്ച് ആൻഡ് ഡവലപ്പ്മെൻ്റ് ഓ‍ർ​ഗനൈസേഷനാണ്(ഡിആർഡിഒ) അ​ഗ്നി-5ൻ്റെ പുതിയ വകഭേദം വികസിപ്പിക്കുന്നത്. ബങ്കർ ബസ്റ്റർ പോർമുനയ്ക്ക് പുറമെ ഉപരിതലത്തിന് മുകളിലുള്ള കേന്ദ്രങ്ങളെ ലക്ഷ്യം വെയ്ക്കുന്നതിനായി ഒരു എയർബർസ്റ്റ് പോർ‌മുനയും വികസിപ്പിക്കുന്നതായാണ് റിപ്പോർട്ട്.

ആണവ പേർമുനകൾ വഹിക്കാൻ ശേഷിയുള്ള നിലവിലെ അ​ഗ്നി -5 ഭൂഖണ്ഡാന്തര ബാലിസ്റ്റിക് മിസൈലിൻ്റെ ദൂരപരിധി 5000 കിലോമീറ്ററോളാണ്. ഇതിൽ നിന്നും വ്യത്യസ്തമായി 7500 കിലോ​ഗ്രാം ഭാരമുള്ള ബങ്കർ ബസ്റ്റർ പോർമുന വഹിക്കാൻ കഴിവുള്ള ഒരു പരമ്പരാ​ഗത മിസൈലാണ് ഡിആർഡിഒ വികസിപ്പിച്ച് കൊണ്ടിരിക്കുന്നതെന്നാണ് ഇന്ത്യാ ടുഡേ റിപ്പോർട്ട് ചെയ്യുന്നത്. കോൺക്രീറ്റ് ബങ്കറുകൾ ഭേദിക്കാൻ ശേഷിയുള്ള നിലയിലാണ് അ​ഗ്നി-5 ബങ്കർ ബസ്റ്റർ‌ ബാലിസ്റ്റിക് മിസൈൽ വികസിപ്പിക്കുന്നതെന്നാണ് റിപ്പോർട്ട്. പൊട്ടിത്തെറിക്കുന്നതിന് മുമ്പ് 80 മുതൽ നൂറ് മീറ്റർ വരെ ഭൂമിക്കടിയിലേയ്ക്ക് തുളച്ചിറങ്ങി പൊട്ടിത്തെറിക്കാൻ ശേഷിയുള്ള ബങ്കർ ബസ്റ്റർ‌ ബാലിസ്റ്റിക് മിസൈലാണ് വികസിപ്പിക്കുന്നത്.

GBU-57ന് സമാനമായ നിലയിൽ ശക്തമായി നിർമ്മിക്കപ്പെട്ടിരിക്കുന്ന ഭൂ​ഗർഭ ലക്ഷ്യങ്ങളിലേയ്ക്ക് പോലും തുളച്ചുകയറാൻ ശേഷിയുള്ള വലിയ പോർമുനകളാണ് ബങ്കർ ബസ്റ്റർ ബാലിസ്റ്റിക് മിസൈലിൽ രൂപകൽപ്പന ചെയ്തിരിക്കുന്നതെന്നാണ് റിപ്പോർ‌ട്ടുകൾ വ്യക്തമാക്കുന്നത്. മാക് 8 നും മാക് 20 നും ഇടയിൽ വേഗത കൈവരിക്കപ്പെടുമെന്ന് പ്രതീക്ഷിക്കപ്പെടുന്ന ഹൈപ്പർസോണിക് ആയുധങ്ങളുടെ ​ഗണത്തിലാവും ഇവയെ പരി​ഗണിക്കുകയെന്നും റിപ്പോർട്ടുകൾ ചൂണ്ടിക്കാണിക്കുന്നു. എട്ട് ടൺ വരെ ഭാരമാകും ഓരോ പോർമുനയ്ക്കും ഉണ്ടാവുക. ഇതോടെ ലോകത്ത് ഏറ്റവും ശക്തിയേറിയ പരമ്പരാ​ഗത പോർമുനകളിൽ ഒന്നായി ഇത് മാറുമെന്നാണ് ചൂണ്ടിക്കാണിക്കപ്പെടുന്നത്. ഇത് ഇന്ത്യയുടെ ആയുധശേഖരത്തിലെ ഏറ്റവും തന്ത്രപ്രധാനമായ ആയുധമായി മാറുമെന്നാണ് റിപ്പോർട്ടുകൾ ചൂണ്ടിക്കാണിക്കുന്നത്. പാകിസ്താൻ, ചൈന തുടങ്ങിയ ശത്രു രാജ്യങ്ങളിലെ കമാൻഡ്-ആൻഡ്-കൺട്രോൾ സെന്ററുകൾ, മിസൈലുകൾ സൂക്ഷിച്ചിരിക്കുന്ന ഭൂ​ഗർ‌ഭ കേന്ദ്രങ്ങൾ, നിർണായക സൈനിക അടിസ്ഥാന സൗകര്യങ്ങൾ എന്നിവ ലക്ഷ്യമിടാൻ ശേഷിയുള്ളതായിരിക്കും ഡിആർ‌ഡിഒ വികസിപ്പിച്ചു കൊണ്ടിരിക്കുന്ന പുതിയ ആയുധങ്ങൾ എന്നാണ് റിപ്പോർട്ട്.

ഇറാൻ-ഇസ്രയേൽ സംഘർഷങ്ങൾക്കിടെ ഇറാൻ്റെ ഫോർദോ ഭൂ​ഗർഭ ആണവകേന്ദ്രം ഉൾപ്പെടെ തകർക്കുക എന്ന ലക്ഷ്യത്തോടെ അമേരിക്ക ബങ്കർ ബസ്റ്റർ ബോംബുകൾ പ്രയോ​ഗിച്ചിരുന്നു. ലോകത്തിലെ ഏറ്റവും ശക്തിയേറിയ പരമ്പരാഗത ബങ്കർ-ബസ്റ്റർ ബോംബുകളായ മാസീവ് ഓർഡനൻസ് പെനട്രേറ്റുകളാണ് അമേരിക്ക പ്രയോ​ഗിച്ചതെന്നായിരുന്നു റിപ്പോർട്ട്.

Content Highlights: India developing advanced bunker-buster missile based on Agni-5